ഫുജൈറ എന്ന സുന്ദരി
എം.പി .എസ് .
വീയ്യോത്ത്
കഴിഞ്ഞ രണ്ട് പതിറ്റാണ്ടായി ഈ
മണല്നഗരത്തില് കഴിഞ്ഞുവരുന്ന എനിക്ക്
അടുത്ത് അറിയാവുന്ന ചിലരെ ഇവിടെ നിങ്ങള്ക്ക്
പരിചയപ്പെടുത്താം, അതല്ലേ അതിന്റെ ശരി . നമ്മള് തമ്മില് തമ്മില്
പങ്കുവയ്ക്കുന്ന കാര്യങ്ങളിലൂടെ പകരുന്ന അറിവ് അതൊന്ന് വേറെ തന്നെയാണ്.
യു. ഏ ഇ
എന്ന അറബ് വംശജരായ മാതാപിതാക്കൾക്ക് ഏഴ് പെണ്മക്കള് ആണ് ഉള്ളത് . മൂത്തവള് അബുദാബി:
അവളെക്കുറിച്ച് പറയുകയാണെങ്കില്
സ്വരുക്കൂട്ടി വച്ച സമ്പത്തുവും ആഡംബരത്തിലും ആരെയും കൈവിടാത്ത മൂല്യങ്ങള് തന്നെയാണ് . അബുദാബി എന്നും കുഞ്ഞനുജത്തി അലൈനേയും കൂടെ ചേര്ത്ത് നിര്ത്തിയിരുന്നൂ.
അവളുടെ കാര്യത്തില് അബുദാബി കാണിക്കുന്ന ആ ശ്രദ്ധ അതൊന്ന് വേറെ തന്നെയാണ് താനും.
അടുത്തവള് ദുബായ് :
ആർഭാഢത്തിന്റെയും ആധുനികതയുടെയും പുതുമുഖമായ
അവളെ എല്ലാവർക്കും എന്ത് ഇഷ്ടമാണ്
എന്നറിയുമോ . അവളെ സ്നേഹിക്കാത്ത ഒരാളും ലോകത്തില് ഇല്ല എന്ന് തന്നെ പറയാം
അത്രയ്ക്ക് ശ്രദ്ധയാണ് മറ്റുള്ളവരുടെ കാര്യത്തില് അവള്ക്ക്. ചിലപ്പോള് ഒരു
ചേച്ചിയെപ്പോലെയും മറ്റുചിലപ്പോള് മകളേപ്പോലെയും വല്ലാത്തൊരു അടുപ്പം
തോന്നാറുണ്ട് അവളോട് . അങ്ങനെ വളരെ കരുതലോടെയാണ് ഓരോ നാളും അവളോടൊപ്പം ഞങ്ങള്
കഴിഞ്ഞു വന്നത് . എന്തോ മാന്ത്രികതയൊളിപ്പിച്ച അവളെ അറിയാതെ നമ്മൾ പ്രണയിച്ച്
പോകും.
അടുത്തവള് ഷാർജ:
ആഢംബരത്തിലും ലാളിത്യം പൂലര്ത്താന് ശ്രമിക്കുന്ന ഇവൾ അറിവിന്റെ കാര്യത്തില് ഒരു മഹാപ്രപഞ്ചമാണ്. പുസ്തകങ്ങളും മറ്റ് സാംസ്ക്കാരിക പ്രവര്ത്തനങ്ങളുമായി
ജീവിതം മുന്നോട്ടുകൊണ്ടുപോവുന്ന ഇവള് ഉള്ളത് കൊണ്ട് സംതൃപ്തയായി കഴിഞ്ഞുവരുന്നൂ.
കുടുംബത്തിലെ എല്ലാ അംഗങ്ങളും ഒത്തുചേരുന്ന സന്ദര്ഭങ്ങളില് സാംസ്കാരികമായ കാര്യങ്ങളിൽ അവള് തീരുമാനങ്ങൾ എടുത്തുവരുന്നൂ .
അടുത്തവൾ അജ്മാൻ:
സാമ്പത്തികമായോ സംസ്കാരികമായോ വലുതായോന്നും
ചൂണ്ടിക്കാണിക്കാന് ഇല്ലാത്ത ഇവളെ പലപ്പോഴും അബുദാബി ചേര്ത്തു നിനിര്ത്താറുണ്ട്
. പലപ്പോഴും നല്ലൊരു കുടുംബിനിയായി എല്ലാവരെയും കൂടെക്കൂട്ടി അവര് സന്തോഷത്തോടെ കഴിഞ്ഞു
വരുന്നു.
അടുത്തവരായ റാസ് അൽ ഖൈമയും ഉം അൽ ഖൊയിനും
ഷാർജ യേയും അജ്മാനെയും പോലെ സാമ്പത്തികമായി വലിയ
വരുമാനമില്ലാത്തവര് ആണെന്നാലും എല്ലാവരെയും സ്നേഹത്തോടെ കൂടെ നിറുത്താന്
ശ്രമിക്കാറുണ്ട് . നല്ല വീട്ടമ്മമാരായ ഇവര് മറ്റെന്തിനെക്കാളും കുടുംബത്തെ
സ്നേഹിക്കുന്നൂ എന്നതാണ് ഞാന് മനസ്സിലാക്കിയത് .
ഇത്രനേരം ഞാന് പറഞ്ഞവരില്
നിന്നും വ്യത്യസ്തയാണ് ഇളയമകള് ആയ ഫുജൈറ അവളുടെ സമീപത്തുകൂടി പല തവണ ഞാന് കടന്നു പോയിട്ടുണ്ടെങ്കിലും ആ ശാലീനതയും
ശാന്തതയും അറിയാനായത് ഈയടുത്ത കാലത്താണ് . ജോലിസംബന്ധമായ കാര്യത്തിനായി അവളുടെ
മണ്ണില് കഴിഞ്ഞ എനിക്ക് അത് ശരിക്കും പുതിയൊരു അനുഭവം ആയിരുന്നൂ. അപ്പോഴാണ് അവളിലെ
കുസൃതി നിറഞ്ഞ പ്രകൃതി ഞാന്
അടുത്തറിഞ്ഞത്.
ദുബായില് നിന്നും താമസം
മാറിയതിന്റെ ദുഃഖ ത്തില് കഴിഞ്ഞ എന്റെ
മുന്നില് മഴയായി പെയ്ത് മനസ്സും മണ്ണും
കുളിര്പ്പിച്ച അവള് എന്നിലെ മുറിവുകള്
സ്നേഹത്തോടെ തണുത്ത കൈനീട്ടി മായ്ച്ചു
കളഞ്ഞപ്പോള് ആണ് മലനിരകള് നിറഞ്ഞ ആ സൌന്ദര്യം ശ്രദ്ധിച്ചത്. അന്ന് ഒരു വെള്ളിയാഴ്ച്ചയായിരുന്നൂ
വൈകി ഫുജൈറ കടല്തീരത്ത് കൂടി നടന്നപ്പോഴാണ് തിരമാലകുഞ്ഞുങ്ങളെ പറഞ്ഞയച്ച് വീണ്ടും വീണ്ടും എന്റെ
കാല്പാദങ്ങള് തൊട്ടുതലോടി ഓടിമാഞ്ഞുകൊണ്ടിരുന്നത് . തിരമാല തീരത്തോട് അടുത്തപ്പോള്
ഞാന് അവിടെ ഇരുന്ന് കൈനീട്ടി തൊട്ടപ്പോള് എന്തോ വല്ലാത്തൊരു സുഖം തോന്നി. അറിയാതെ
അവളെ സ്നേഹിച്ചു തുടങ്ങിയത് അപ്പോഴാണ് ഞാന് മനസ്സിലാക്കിയത് . ഇപ്പോള് അവളില് നിന്നും
അകന്ന് ഞാന് ദുബായില് തിരിച്ചെത്തി എങ്കിലും ആ നല്ല നാളുകളുടെ ഓര്മ്മ എന്നില്
വല്ലാത്തൊരു അനുഭൂതി നല്കുന്നൂ. ഇന്ന് ഞാന് ആരെ സ്നേഹിക്കണം എന്ന വല്ലാത്തൊരു
വിഷമ വൃത്തത്തില് ആണ്. കാലമാകുന്ന ജീവിത വീഥിയില് എന്റെ കുടുംബത്തിനോപ്പം
പ്രവാസം സമ്മാനിച്ച ഒത്തിരി കൂട്ടുകാരും ഓര്മ്മകളുമായി ഇന്നും ഈ മണ്ണില്
നിങ്ങളില് ഒരുവനായി ഞാനും .
