ഗുഹ എന്ന ബുഫേ

ഗുഹ എന്ന ബുഫേ 

എം പി എസ് വീയ്യോത്ത്

"ലോറൻസേ  ഇഞ്ഞി  ഏടെക്കാ  പോന്നേ  " എന്ന വിളികേട്ടാണ് അയാൾ നിന്നത്.

പിന്നെ തല തിരിച്ചു പിറകിലേക്ക്  നോക്കി. അതാ  മടക്കിയ വെറ്റിലയും  പുകയിലയും അടക്കയും കൂടി  എ ടി എം ലേക്ക് കാർഡ് തള്ളുന്നതുപോലെ വായിലേക്ക് തള്ളിക്കൊണ്ട്   ജാനുവേടത്തി നിൽക്കുന്നൂ . എവിടേക്കോ പോവാനുള്ള  പുറപ്പാടിലാണെന്ന്   അയാൾക്ക്‌ കണ്ടപ്പോഴേ  മനസ്സിലായി  .

അയാൾ ചിരിച്ചുകൊണ്ട്  " ഞാൻ  ചന്ദ്രന്റെ മോളെ കോപ്പിന് പോന്നാ , ഇങ്ങളേടിയാ പോന്നേ ?" എന്ന്  മറുപടി പറഞ്ഞു  .

ജാനുവേടത്തി "ഞാളും ആടത്തേക്കാ , തെക്കേലെ വിമലയും നാരാണീം വരാന്നു പറഞ്ഞിക്ക്  , ഞാൻ ഓലേം കാത്തിരിക്കുന്നാ മോനെ "എന്ന് മറുപടിയും പറഞ്ഞു .

പിന്നെ കുറച്ചു നേരത്തെ നിശബ്ദദയ്ക്ക് ശേഷം  ജാനുവേടത്തി തുടർന്നു  " ആഡേ ഭച്ചണം  ഗുഹയാന്നാ കേട്ടെ "

ലോറൻസ് ശരിക്കും ഞെട്ടി " ജാനുവേടത്തി എന്താ ഈ ഗുഹ ?"

ജാനുവേടത്തി  വിശദീകരിച്ചു തുടങ്ങി " അത് പാത്രവുമെടുത്തു തെണ്ടി തിന്നുന്നില്ലേ അത് "

ലോറൻസ് ചിരിച്ചുകൊണ്ട് പറഞ്ഞു " ജാനുവേടത്തി അത് ഗുഹയല്ല ബുഫേ ആണ് "

ജാനുവേടത്തിക്കു അത് അത്ര സുഖിച്ചില്ല . സത്യം  കുട്ടികളും പുരുഷപ്രജകളും ഇത് ആസ്വദിക്കുന്നൂ പക്ഷെ പറഞ്ഞാൽ ഇന്നും പല നാട്ടിൻ പുറത്തുള്ള സ്ത്രീകൾക്കും മനസ്സുകൊണ്ട് യോചിക്കാൻ പറ്റാത്ത ഒരു വ്യവസ്ഥിതിയാണ് ബുഫേ .

 അവർ നീരസത്തോടെ പറഞ്ഞു " എന്തായാലും എനക്ക് അത്ര വിവര മൊന്നുമില്ല  എന്തായാലും തെണ്ടിത്തിന്നുന്ന ഏർപ്പാടല്ലേ  അത് മതി "

അതിനിടയിൽ വിമലേടത്തിയും നാരായണേടത്തിയും അങ്ങോട്ടേക്ക് വന്നു .  അങ്ങനെ ലോറൻസ് എല്ലാവരോടും യാത്ര പറഞ്ഞു മുന്നിൽ നടന്നു നീങ്ങി.

 പിറകിൽ  നിന്നും ജാനുവേടത്തിയുടെ മറ്റുള്ളവരോടുള്ള സംസാരത്തിൽ ഗുഹയുടെയും തെണ്ടിത്തിന്നലിന്റെയും വിവരണങ്ങളും കേട്ട്കൊണ്ട്   ചുണ്ടിൽ ഒരു ചിരിപടർത്തിക്കൊണ്ടു  അയാൾ മുന്നോട്ട് നടന്നു .

ചിലരങ്ങനെയാ പുതിയ കാര്യങ്ങളെ മനസ്സാൽ പെട്ടെന്ന് അംഗീകരിക്കാനും   അതുപോലെ അവരിലെ  തെറ്റ് ആരെങ്കിലും ചൂണ്ടിക്കാട്ടിയാൽ  അത് തിരുത്താനും  വളരെ പ്രയാസം തന്നെയാണെന്ന്   അയാളുടെ ആ ചിരിയിൽ തെളിഞ്ഞു കാണാമായിരുന്നൂ .